அதிகாலை நேர சோம்பல்
களைத்துப் போன சமையல்...
யந்திரத்தனமான புன்னகைகள்,
மந்தமான நினைவு சூழ் மதியம்
அலுவலக் களைப்போடு மாலை
உறக்கம் மீறிய அயர்ச்சி ஆயாசம்
இரவில் தன்னோடு பேசி விழிப்பு
மனதின் ரகசிய மூச்சுவாங்கல்
இத்தனையும் நினைவுபடுத்தும்
தாய் வீட்டின் மீதான காதலை
கண்டித்தாலும் கவலைப்படாத
காலை வேளை உன்னத உறக்கம்
பல் தேய்க்க எட்டி விரட்டும்
அருமருந்தான கொதிக்கும் தேநீர்
குளியல் யோசனை மறக்கடிக்கும்
குண்டுகுண்டாய் தும்பை இட்லி
மறந்துபோன கீரைகடையல்
மலைக்கவைக்காத சாப்பாடு
அம்மாவின் மடி புதைந்து
உறக்கத்துடன் கூடிய மதியம்
குழந்தை மனதுடன் வாசம் வீசும்
மாலையில் சூடும் மல்லிகைச்சரம்
எனக்கான என் தேடல் மறைந்த
மறுபிறவி புத்துணர்வுடன் துயில்
ஒரு ஓட்டத்திற்கு தயாராகும்
விளையாட்டு வீராங்கனையாக
உள்ளேயும் வெளியேயும் ஆற்றி
புதிதாய் பிறக்கும் மாயம் செய்யும்
அற்புதமான என் அம்மா வீடு.
ஆனால் ........
அம்மாவுடைய வீடு அதுவல்ல.
