நான் ஒரு விண்மீன் குஞ்சு!
விஞ்ஞானம் சொல்கிறது.
பரந்த வெளியில் மிதந்த
ஒரு நெருப்புக் கோளம்,
வெடித்து சிதறிய நொடி
அண்டம் பிறந்தது அங்கு.
எனில் நெருப்பில் வந்தனரா
என் விண்மீன் மூதாதையர் ?
தீயில் பிறந்து தீயுடன் வளர்ந்து
நான் நெருப்பின் மகளாய்,
வேகாமல் வெந்து தணிகிறேன்
நித்தம் சுழற்றும் ஊழித்தீ
இன்னும் சுவாலை வீசி
வளர்சிதை மாற்றம் கொள்ளும்.
ஆற்றல் பொருளாகும் எனில்
பொருள் ஆற்றலாகும் !
புரிகிறதா...?
அந்த சூட்சுமம் தேடுகிறேன்
என்றாவது ஒரு நாள்....
அடிவயிற்றுக் கொள்ளியில்
பொருள் ஆற்றலாகும் ....
மீண்டும் பரந்தவெளி நாடும்.
ஆகாயத்தில் எரிந்து கொண்டே
அன்றும் சொல்லுவேன்
நான் ஒரு விண்மீன் குஞ்சு!